我不是打手


成日有人問我嘅工作究竟係做啲乜,當我回答我係做E-Marketing嘅時候,大多數人嘅反應都係反問我 “係咪即係打手” ? 更甚有人問過我,你做哩行開唔開到飯? 面對哩啲問題,基本都係一般答法: 還可以啦, 餓唔死啦, OK啦… 最後補句得閒飲茶。

坦白講,以上對話除咗令我有啲無奈之外,其實亦令我反思原來網絡行銷哩個行業,雖然已經發展咗10幾年,但認識哩個行業嘅人真係唔算多。根據本人經驗,以下係一般人對從事網絡行銷人士嘅錯覺: 論壇打手, Programmer, I.T.人, 機械人, Designer, 作家等等。

其實網絡行銷係一門科學 (賣花讚花香),主要利用線上媒介,發展以及宣傳企業。當中方法可以仔分為: 搜尋器推廣 (例如搵野必用嘅Google, Yahoo, 百度等) , 展示式廣告 (例如十分常見嘅Banner廣告), 社交推廣 (例如你每日都會睇嘅Facebook, Instagram等), 影片廣告 (例如被Skip唔收錢嘅YouTube廣告), 仲有口碑行銷, 聯盟行銷, 電郵行銷……下刪三千字。

大家有無諗過每日上網見到嘅資訊從何而來? 每日睇Facebook時點解某位眉清目秀嘅仁兄總會排得比較前? 點解Search同一隻字,你同我嘅Search result會唔同? 點解登記會員時成日要填某堆野而唔係其他? 點解Banner廣告成日識得顯示我旅行想去嘅地方? 點解要問咁多點解?…

喺網絡世界入面,每一篇文章,每一個排序,每一個連結,每一個按鈕,背後都有不同嘅數據同分析嚟支持。包括點擊率、跳出率、停留時間、質量指數、每次點擊出價同每千次曝光出價… 我想講嘅係,專業嘅網絡行銷,每個行為、每個圖像同每個文字都係講求創意結合數理化嘅分析,並唔係無中生有,無的放矢。

是咁的,你以為你每日上網見到嘅廣告係亂咁出,其實係有系統喺背後分析咗你係咩人,最近搵過咩資料,平日鐘意做咩野等,先至將比較適合你睇嘅廣告顯示喺你眼前。咁點解你仲會成日見到啲完全唔關事嘅廣告? 因為都要睇廣告商識唔識做Setting。

假設你係一名非常麻甩嘅男士,如果你上網不斷見到女性內衣廣告,原因好有可能係因為該名廣告商Setting比較廣泛。如果俾你落廣告,你會用同一筆錢,將同一個廣告隨機派俾一百萬個人睇,定係派俾一百萬個有Potential嘅人睇?

雖然依家網絡行銷仲未成為一門公認嘅科學,但絕不代表網絡行銷並非一門專業,好多時只係網絡行銷哩個市場變化得太快。假如學校開設有關嘅常規課程,同學今日喺學校學到嘅,聽日已經有可能完全唔適用,亦正因為哩個原因,從事網絡行銷哩個行業嘅人,同好多其他行業相比之下,更加需要長期學習,甚至寓學習於生活,要每日喺網上觀察唔同嘅細節,學習同研究。

寫咗咁耐,Last一句。喺度希望有心喺哩行發展嘅行家們,記得要Keep住update自己,講正確嘅說話,做正確嘅事情,尊重自己嘅職業,尊重自己嘅行業。完!